28 apr: Groet Mestreechs Dictee 2019

Op zoondag 28 aprèl 2019 organisere veer ’t Groet Mestreechs Dictee 2019. Veer starte um 11.00 oor. Vaanaof 10.30 oor goon de deure vaan ’t Centre Céramique speciaol veur uuch ope. In de poos höbbe veer e verrassend program veur uuch en numme veer ’t dictee mèt uuch door. Roond 14.00 oor verwachte veer d’n oetslaag bekind te kinne make.
Daot geer mèt?
Eus motto is: mètdoen is belangrieker es winne! Es g’r geïntrèsseerd zeet in de Mestreechter taol en g’r sjrijf ’t dèkser, veurwat zouwt g’r daan neet mètdoen?
Insjrieve es gróp
Wat leuk is ‘t es g’r neet allein, meh ouch same mèt vrun, femilie of collega’s es gróp kint deilnumme. ‘ne Gróp tèlt minimaol drei persoene. Allein de score vaan de drei bèste deilnummers vaan eure gróp, tèlt mèt veur ’t indrizzeltaot.
Veur spek en boene mètdoen
Nog neet gans zeker vaan eur zaak? Daot daan ’ns mèt veur spek en boene. Dit hèlt in: zittentere op de trappe mètsjrieve en bij ’t doornumme vaan ’t dictee zelf ’t aontal foute tèlle. G’r wèt daan metein of g’r volgend jaor wel officieel mèt wèlt doen! Wat hèlt uuch tege? Um de basis vaan ’t gesjreve Mestreechs oonder de knee te kriege zien op de website www.mestreechsdictee.nl 14 hendege spellingtips te vinde. Ouch op de Facebookpagina vaan Veldeke Krink Mestreech weure regelmaoteg tips geplaots die ideaol zien um te gebruke bij de veurbereiing. Mie achtergroondinformatie euver ’t Mestreechs is te vinde op www.mestreechtertaol.nl.  Aonmelle veur ’t dictee kin op www.veldekemestreech.nl/dictee  | Mètdoen: gratis |

Locatie en tijdstip: Centre Céramique, 11.00-12.00 uur

Organisatie: Veldeke Kring Maastricht